Wednesday . 08 . Ju7y . 2009
‧News Wanted‧女工訪問．玉蓮
編按：一個都不能少。女工在中大除了賣野食，還是社區的一份子，讓我們來，聽她的故事。未來幾星期，我們會一一upload她們的訪問，敬請留意、轉貼、支持。
*********
除了糖水，各位女工還有不少絕技。天天見面，你認識她們嗎？
中文大學人來人往，她們各自因為不同原因，在這裡駐足七年。
為香港的繁榮付出了半生努力，她們到今日還是各自為了理想／生計堅持。社會大環境改變，女人在當中又要如何自處？且待我們一起，發掘發掘。
「大學生，純潔D，叻D」
初時聽到來中文大學做事，玉蓮第一時間話好，覺得大學唔會品流複雜。「大學生，純潔啲，唔會呃人。見吓大學生，自己都好似年輕咗。」玉蓮話覺得大學生「好叻」，問佢點解咁諗？「讀得大學都一定有番咁上下成績啦。」小記於心有愧。九個女工社員都識得用fax機，小記就見過唔少大學同學搞一大輪都fax唔到，又搞錯正反面；反而女工上咗年紀，一樣快上手，office
新手分分鐘唔夠佢地來。
古板媽媽開竅政府腦筍未生埋
玉蓮話合作社工作令佢睇開咗。美媽生美女，玉蓮大女追求者眾，中二開始就有男生係學校門口等放學。勞氣一輪，玉蓮話，「喺合作社開咗眼界，做家長無咁死板，唔會話吓吓都咁執著，事事有商有量。」不過初時，都會擔心女人出來工作，無人湊仔。細仔當時七歲，仲讀緊小學。「佢打電話來問，媽媽幾時返呀？我問佢係咪驚自己一個人，佢又話唔係。返到屋企，見佢著晒全屋啲燈。」見仔仔擔驚受怕，肉都赤。諗起政府嘅所謂「欣曉計劃」，一面迫仔女年滿十二歲嘅單親綜緩媽咪出外工作，一面又扮關心兒童，拘捕「獨留兒童在家中」嘅父母，小記與玉蓮為政府嘅無鬼聊政策同聲一嘆。
由「維他天地」，到合作社
仔女大咗玉蓮重投職場，聽政府指揮，修讀家務助理培訓課程。「唓，教嘅嘢原來同我平時喺屋企打掃一樣。」讀完，無人跟進過點搵工。「有一堂講吓搵工，教我地要同僱主講自己嘅要求喎。」職場競爭大，玉蓮係一間中學既「維他天地」做咗幾個月，就過檔合作社。「我認同合作社理念嘛。一人一票民主決定所有嘢，又可以參與其他活動，工作多啲彈性，唔會有老闆。」
有老闆都好啩？聽指揮，唔使諗，點解會由穩穩陣陣嘅「維他天地」過檔，去中大一間咩都無嘅合作社？玉蓮話，「無得加入自己嘅意見嘛！老闆錯咗都一樣要聽。」小記參加過女工會議，的確一人一句氣氛非常熱熾。有時小記自己都會頂唔順：點解佢地咁長氣架？但係我真係見到，佢地開會嘅時候好開心，開心過我自己傾project！可能係，因為佢地有得揀個，自己鍾意嘅題目啩。
浪漫理想
玉蓮覺得，合作社係一種好好嘅模式，因為「上左年紀就總會比人年齡歧視，想做工又要照顧屋企，只有合作社先俾到呢種彈性。好多人未到退休又想搵嘢做，好難，尤其是女人。」
小記其實有啲唔同意，同玉蓮提番，其實合作社喺外國搞得好大，唔似香港，變成咗讓所謂「弱勢社群」可以苟延殘喘嘅「慈善」項目。
合作社不單係一份工，更係一場翻天覆地嘅浪漫運動，源於我地相信人性美好，相信人與人之間可以互相合作。小記覺得女工真係好神奇：當全個社會都教你要點樣踩住其他人上位嘅時候，合作社卻係一個活生生例子，証明人與人之間可以靠互相信任來維繫。而且呢種互相信任唔係工具性嘅，而係出於人性最簡單純真嘅善良。好多同學都會有經驗，有時去女工買野食爭幾蚊散銀，女工會叫你食住先，第日行過再俾番錢。而女工同小記講，絕大部份同學都唔會呃佢地。女工話：「都係中大同學來嘛，唔信佢地信邊個。」小記成日覺得，喺今日呢個世界仲會有人咁願意相信、咁願意覺得其他人善良，真係，一件好令人感動嘅事。
頂起半邊天
玉蓮已經喺女工合作社做咗七年，對於女人喺社會上嘅位置有啲睇法。「我覺得女人都好犀利。男人剩係負責搵錢就得，女人要細心好多，又要睇仔女功課，又要煮飯買菜。」何止？有時男人搵唔夠錢，女人都要搵埋一份。但係講嘅時候玉蓮亳無怨氣，只有對女人嘅欣賞同詫異。小記就有啲百般滋味：點解所有女人都要咁乖、咁好、咁叻嘅？
玉蓮話「做合作社就大開眼界，見多好多嘢。」不過有時小記又諗，各位女工對合作社運動可能都仲要多啲時日去了解（當然各位同學都係），起碼唔好覺得合作社係用來「安置」「我地呢啲女人」，將自己放喺弱勢、「要人幫」嘅位置。其實佢地至係最有力量，對工人最有啟發性嘅一群。
請加入「中大．女工．基關」：
http://www.facebook.com/group.php?gid=29088483496&ref=nf
Post a Comment